'कथेसर' दक्षिणी कोरिया में लोकार्पित / कथेसर
| मुखपृष्ठ » | पत्रिकाओं की सूची » | पत्रिका: कथेसर » | अंक: जुलाई-सितम्बर 2012 |
गवांझू सिटी (दक्षिण कोरिया)-'कथेसर' रैदूजै अंक रै ई-संस्करण रो लोकार्पण 20 मई नै दक्षिण कोरिया में हुयो। गवांझू सिटी स्थित यॉन्गसु-री सभागार में प्रवासी राजस्थान्यां रै संगठन राजस्थानी गौरव मंच कानी सूं आयोजित कार्यक्रम में मंच अध्यक्ष पीथाराम ज्याणी लेपटॉप माथै पत्रिका रो लोकार्पण कीनो। इण मौकै मंच सदस्यां 'कथेसर' संपादक रामस्वरूप किसान अर डॉ. सत्यनारायण सोनी सूं ऑनलाइन संवाद कीनो अनै लोकार्पण री बधाई दीनी। सभा रो संचालन करता थकां मंच उपाध्यक्ष रामचंद्र भंवरिया बतायो कै आ राजस्थानी री पैली अैड़ी पत्रिका है जिणरो हर अंक प्रिंट संस्करण रैसाथै-साथै ऑनलाइन भी उपलब्ध है। इणसूं आपरी मायड़भाषा री मीठास रो वै विदेस में भी आणंद ले सकैला। कार्यक्रम में कोरियन साहित्यकार वू ज्यून जूंग व जॉन इवन रान बतौर अतिथि मौजूद हा। जूंग राजस्थानियों रै मायड़भाषा प्रेम री सरावणा करता थकां कैयो कै मायड़भाषा ई मिनख नै आपरी जमीन अनै संस्कृति सूं जोड़्यां राखै। रान राजस्थानी री गौरवशालीसाहित्यिक परम्परा री सरावणा कीनी। मंच अध्यक्ष पीथाराम ज्याणी राजस्थानी भाषा, साहित्य अर संस्कृति री महता रो बखाण करता थकां कैयो कै मायड़भोम, मायड़भाषा अर जामण जाई मां रो दरजो सुरग सूं भी ऊंचो व्है। कोषाध्यक्ष आसकरण प्रजापत, सचिव रामोतार स्वामी अर प्रवक्ता सुनील कुमार रांकावत भी विचार प्रगट कीना। इण वेळा रतनगढ़ वासी राजस्थानी रा मधुर गीतकार स्व. गजानन वर्मा नै सरधा-सुमन भी अर्पित करीज्या। -सुनील कुमार रांकावत
