अकादमी रो सालीणो जलसो / कथेसर
| मुखपृष्ठ » | पत्रिकाओं की सूची » | पत्रिका: कथेसर » | अंक: जुलाई-सितम्बर 2012 |
बीकानेर-राजस्थानी भाषा, साहित्य एवं संस्कृति अकादमी रो सालीणो जलसो 7 जुलाई नै टाऊन हॉल में हुयो। इण बरस रो सूर्यमल्ल मीसण शिखर पुरस्कार बीकानेर रा शिवराज छंगाणी नै वां रै लघुकथा-संग्रै 'इक्कड़ बिक्कड़' सारू दीरीज्यो। इणी भांत गणेशीलाल व्यास 'उस्ताद' पद्य पुरस्कार मुम्बई रा मधुकर गौड़ नै वां रै गीत संग्रै 'गीतां री पांण', शिवचंद भरतिया गद्य पुरस्कार उदयपुर रा हरमन चौहान रै 'लखणां रा लाडा', मुरलीधर व्यास राजस्थानी कथा-साहित्य पुरस्कार श्री डूंगरगढ़ रा श्रीभगवान सैनी रै कहाणी संग्रै 'भेख', बावजी चतुरसिंह अनुवाद पुरस्कार कोटा रा ओम नागर नै वां री पोथी 'जनता बावळी हो'गी', सांवर दइया पैली पोथी पुरस्कार जयपुर रा दुष्यंत नै वां रै कविता-संग्रै 'उठै है रेतराग' अर राजस्थानी बाल-साहित्य पुरस्कार चितौडग़ढ़ रा राजकुमार जैन नै वां री पोथी 'लाडेसर बण ज्यावां' सारू दीरीज्यो।
समारोह रो बडेरचारो करता थकां राजस्थान साहित्य अकादमी-उदयपुर रा अध्यक्ष वेदव्यास कैयो कै राजस्थानी पुनर्जागरण रै सवाल माथै नुंवी पीढी नै साथै जोड़णी जरूरी है। सिरै पांवणा राजस्थान विधानसभा रा उपाध्यक्ष रामनारायण मीणा कैयो कै राजस्थानी साहित्य में जको प्रेम, अपणायत अनै मिठास है, वो दुनिया री किणी भाषा में नीं। इण भाषा में माटी री सौरम अनै संस्कारां री महक है। महाराजा गंगासिंह विश्वविद्यालय रा कुलपति गंगाराम जाखड़ जाणकारी दीनी कै विश्वविद्यालय में राजस्थानी रो सुतंतर विभाग थापित करबा सारू प्रयास चाल रैया है।
अकादमी अध्यक्ष श्याम महर्षि, सचिव पृथ्वीराज रतनू अर कोषाध्यक्ष बुलाकी शर्मा विचार राख्या। इण मौकै जागती-जोत रै अंक रो लोकार्पण पण करीज्यो। सीकर रै राजपालसिंह शेखावत अर बीकानेर री जयश्री व्यास नै भतमाल जोशी महाविद्यालय पुरस्कार अनै लूणकरणसर रै गंगासागर सारस्वत अर राजसमंद री संस्कृति कंवर राव नै मनुज देपावत विद्यालय पुरस्कार दीरीज्या। -सतीश छिम्पा
