कवितावां / सतीश छिम्पा / कथेसर

मुखपृष्ठ  »

पत्रिकाओं की सूची  »

पत्रिका: कथेसर  »

अंक: अक्टूबर-दिसम्बर 2012

एंजेलिना जोली अर किरतै बडै आळी समेस्ता

आखी दुनिया रा अखबार कैवै
भोत सूणी अर चोखी अभिनेत्री है एंजेलिना जोली
आखै हॉलीवुड पर उणरै फुटरापै रो जाळ पसरर्यो है
अेक चमकीलै पानांवाळी पत्रिका लिखै-
'एंजेलिना जोली इण संसार रो मोती है’
म्हूं बांचूं अनै सोचूं
कै साची बा भूरै बाळां-वाळी एक्टरणी इत्ती फूटरी है
का इत्ती चोखी है उणरी एक्टिंग
कै आखी दुनिया रा अखबार करै फगत उणी री बडाई।

किरतै बडै आळी समेस्ता आगै सूरज ई संकै
उणरो फूटरापो देखण सारू डिण्डां सूं नरमो बारै आ ज्यै।
वा फेरन लवली नीं लगावै
पोडरां रो नांव तकात नीं जाणै
पण फेर ई/ जद चालै बा
आभो उणरा कोड करण करण सारू लफ-लफ आवै
बा किणी अखबार रो मान नीं बधावै
नीं पड़ै उण माथै किणी चमकीलै पानां वाळी
पत्रिका रै रिपोर्टर रै कैमरै रो फ्लैस
क्यूंकै बा समेस्ता है
किरसै री जायी
पसीनै रै बंट निपजावै आप रा भाग
द्यै बूढै बाप नै स्हारो।
बा एंजेलिना जोली नीं बण सकै
पण ओ ई सांच है कै
एंजेलिना जोली रै आ ज्यै झाग
जे बणै बा समेस्ता।