तू नू हाथ मत पकडया कर / नवीन रमण

Gadya Kosh से
यहाँ जाएँ: भ्रमण, खोज

हिमांशु और प्रमिला

हिमांशु

जन्मदिन मुबारक

तू भी नू सोचता होगा अक मन्नै क्यूकर बेरा लाग्या अक आज तेरा जन्मदिन सै।

मन्नै तै कई साल का पता सै। जब मासटर फारम भरै था ना। जबे देख ली थी मन्नै तारीख। मेरी सारी कापियां पै 23 जनवरी लिख्या मिलैगा तन्नै। मेरे गोलू-मोलू से जब तू हांसै है ना। मन्नै घणा कसुत्ता लाग्गै सै।

ऊ तै तू सबनै कसुत्ता लाग्गै सै। पर मन्नै सब तै घणा लाग्गै। तन्नै मैं किसी लागू सूं। तू लिख कै बता देगा तै मन्नै जी-सा आ ज्यागा। तेरी आंख्या(आँखों) मैं तै मन्नै आपणे खात्तर घणा प्यार दिखै सै। फेर भी तू लिख देगा तै ठीक रहवैगा।

आमी-स्यामी तै मैं सुण कोणी सकूँगी। मन्नै घणी शरम आवैगी। फेर तू बात करदा-करदा हाथ भी तै पकड़ ले सै। मेरे सारे गात मैं सरण-सरण हो ज्या सै। बावळी हो ज्या सूं मैं तो कती।

तेरी आपणी बावळी

प्रमिला