पदम मेहता नै मिल्यो लखोटिया पुरस्कार / कथेसर
| मुखपृष्ठ » | पत्रिकाओं की सूची » | पत्रिका: कथेसर » | अंक: अक्टूबर-दिसम्बर 2012 |
15 सितम्बर, 2012 नै राजस्थान रा वरिष्ठ पत्रकार अनै 'माणक’ रा संपादक पदम मेहता नै नई दिल्ली रा हिन्दी भवन सभागार में राजस्थानी अकादमी कानी सूं आयोजित भव्य समारोह मांय रामनिवास आशारानी लखोटिया ट्रस्ट रो 19वों लखोटिया पुरस्कार अरपण करीज्यो।
पुरस्कार सरूप राजस्थानी अकादमी रा अध्यक्ष अर रामनिवास आशारानी ट्रस्ट रा मैनेजिंग ट्रस्टी रामनिवास लखोटिया मेहता नै अेक लाख रिपिया रोकड़ा अर सैनाणी सूंपी अनै शाल ओढायो। इण मौकै दिल्ली में प्रवासी राजस्थानियां री गतिविधियां रो प्रचार-प्रसार करवा में सरावणजोग सैयोग करण सारू राजस्थान सूचना केंद्र रा संयुक्त निदेशक गोपेन्द्र नाथ भट्ट, ई.टी.वी. राजस्थान रा दीपक कुमार अर दूरदर्शन समाचार रा डॉ. ओ.पी.यादव नै पण निसांणी भेंट करनै सम्मानित करीज्या पुरस्कार-सम्मान अरपण कर्यां पछै पदम मेहता कैयो कै वै ओ सम्मान राजस्थानी भाषा-कला-संस्कृति नै समर्पित करै है। इणी रै साथै वां घोषणा कीन्ही कै राजस्थानी भाषा-साहित्य देश-विदेश में घर-घर पुगावण सारू माणक संस्थान बेगो ई कम कीमत री पोथ्यां छापैला। इण वेळा 22वीं राजस्थानी सामूहिक लोकनृत्य प्रतियोगिता रा विजयी प्रतियोगियां नै पुरस्कार भी बांटीज्या। इणसूं पैलां स्वागताध्यक्ष जी.पी.बंसल दीवो चासनै समारोह रो शुभारंभ कीन्हो। समारोह मांय ट्रस्ट रा रोशनलाल अग्रवाल, एम.के.धानुका, सुभाष सरीन, सुनील बिहाणी, राजेन्द्र व्यास भी मौजूद हा। संचालन सुमन महेश्वरी कर्यो।
